Monday, August 29, 2011

आ राजस्थानी भासा है ।

आज आपरी नज़र करूं

आदरजोग शक्ति दान जी कविया री ऐतिहासिक कविता

इणरौ इतिहास अनूठो है, इण मांय मुलक री आसा है ।

चहूंकूंटां चावी नै ठावी, आ राजस्थानी भासा है ।

जद ही भारत में सताजोग, आफ़त री आंधी आई ही ।

बगतर री कड़ियां बड़की ही, जद सिन्धू राग सुणाई ही ।

गड़गड़िया तोपां रा गोळा, भालां री अणियां भळकी ही ।

जोधारां धारां जुड़तां ही, खाळां रातम्बर खळकी ही ।

रड़वड़ता माथा रणखेतां, अड़वड़ता घोड़ा ऊलळता ।

सिर कटियां सूरा समहर में, ढालां तरवारां ले ढळता ।

रणबंका भिड़ आरांण रचै, तिड़ पेखै भांण तमासा है ।

उण बखत हुवै ललकार उठै, वा राजस्थानी भासा है ॥१॥

इणमें सतियां रा शिलालेख, इणमें संतां री बाणी है ।

इणमें पाबू रा परवाड़ा, इणमें रजवट रो पांणी है ।

इणमें जांभै री जुगत जोय, पीपै री दया प्रकासी है ।

दीठौ समदरसी रामदेव, दादू सत नांम उपासी है ।

इणमें तेजै रा वचन तौर, इणमें हमीर रो हठ पेखौ ।

आवड़ करनी मालणदे रा, इणमें परचा परगट देखौ ।

जद तांई संत सूरमा अर, साहितकारां री सासा है ।

करसां रै हिवड़ै री किलोळ, आ राजस्थानी भासा है ॥२॥

करमां री इण बोली में ही, भगवान खीचडौ़ खायौ है ।

मीरां मेड़तणी इण में ही, गिरधर गोपाळ रिझायौ है ।

इणमें ही पिव सूं माण हेत, राणी ऊमांदे रूठी ही ।

पदमणियां इणमें पाठ पढ्यौ, जद जौहर ज्वाळा ऊठी ही ।

इणमें हाडी ललकार करी, जद आंतड़ियां परनाळी ही ।

मुरधर री बागडोर इणमें ही, दुरगादास संभाळी ही ।

इणमें प्रताप रौ प्रण गूंज्यौ, जद भेंट करी भामासा है ।

सतवादी घणा सपूतां री, आ राजस्थानी भासा है ॥३॥

इणमें ही गायौ हालरियौ, इणमें चंडी री चिरजावां ।

इणमें ऊजमणै गीत गाळ, गुण हरजस परभात्यां गावां ।

इणमें ही आडी औखांणा, ओळगां भिणत वातां इणमें ।

जूनौ इतिहास जौवणौ व्है, तौ अणगिणती ख्यातां इणमें ।

इणमें ही ईसरदास अलू, भगती रा दीप संजोया है ।

कवि दुरसै बांकीदास करन, सूरजमल मोती पोया है ।

इणमें ही पीथल रचि वेलि, रचियोड़ा केइक रासा है ।

डिंगळ गीतां री डकरेलण, आ राजस्थानी भासा है ।।४॥

इणमें ही हेड़ाऊ जलाल, नांगोदर लाखौ गाईजै ।

सौढो खींवरौ उगेरै जद, चंवरी में धण परणाईजै ।

काछी करियौ नै तौडड़ली, राईको रिड़मल रागां में ।

हंजलौ मौरूड़ौ हाड़ौ नै, सूवटियौ हरियै बागां में ।

इणमें ही जसमां औडण नै, मूमल रूप सरावै है ।

कुरजां पणिहारी काछवियौ, बरसाळौ रस बरसावै है ।

गावै इणमें ही गोरबंद, मनहरणा बारैमासा है ।

रागां रीझाळू रंगभीनी, आ राजस्थानी भासा है ॥५॥

इणमें ही सपना आया है, इणमें ही औळूं आई है ।

इणमें ही आयल अरणी नै, झेडर बाळौचण गाई है ।

इणमें ही धूंसौं बाज्यौ है, रण-तोरण वन्दण रीत हुई ।

इणमें ही वाघै-भारमली, ढोलै-मरवण री प्रीत हुई ।

इणमें ही बाजै बायरियौ, इणमें ही काग करूकै है ।

इणमें ही हिचकी आवै है, इणमें ही आंख फ़रूकै है ।

इणमें ही जीवण-मरण जोय, अन्तस रा आसा-वासा है ।

मोत्यां सूं मूंगी घणमीठी, आ राजस्थानी भासा है ॥६॥

Saturday, August 6, 2011

दूहा अर उलटा दूहा

दूहा 

सावण आयो सायबा, दूर देश मत जाय !
तन भीज्यो बरसात में, मन में लागी लाय !!
सावण घणो सुहावणो, हरियो भरियो रूप !
निरखूं म्हारो सायबो, सावण घणो कुरूप !!
साजन उभा सामने, निरखे धण रो रूप !
बादलियाँ रे बीच में, मधुरी मधुरी धूप !!
जोगेश्वर गर्ग
उलटा दूहा
साजन घरां पधारिया, छोड़ परायो देश !
सावण बरसा बादली, अतरी अरज विशेष !!
हिवडे हरख विशेष व्हे, जद साजन घर आय !
मन री मौजां मर रही, सावण सूखो जाय !!
साजन सैणां समझग्या, आया छोड़ विदेश !
सावण तू भी समझ जा, बरसा मेह विशेष !!
जोगेश्वर गर्ग

Friday, July 29, 2011

म्हारी पीड़ री वां’नैं खबर लागै



उडीकूं रोज… , म्हारी पीड़ री वांनैं खबर लागै
मगर मनमीत पर म्हारै दुशमणां रौ असर लागै
भंवर सूं पार उतरूं म्है जे थारौ हाथ हाथां में
बिछोड़ा जद हुया थासूं  ; किनारो भी भंवर लागै
कसमसावै घणा वे लोग सिंघासण पलंगां  पर
बबूली छांव में म्हांनैं छतर लागै चंवर लागै
भर्या भण्डार जद घर में ; संतरी  सांतरा राखै
लुट गया माल मत्ता तो न भय लागै न डर लागै
मगज ठंडो नज़र नीची सबद मीठा घणा मुश्किल
चढै मद राज रौ बांनैं  मतीरो भी मटर लागै
ज़मीं में ज़हर धोखै रौ , हवा में चापलूसी है
मनां में मैल मिनखां रैअजूबो औ शहर लागै
शहर में खूब चर्चा है समझ कोनी सकै कोई
जोगेश्वरगयो-गुजर्यो न जोगेश्वरज़बर लागै
ग़ज़लकार : जोगेश्वर गर्ग

Tuesday, June 1, 2010



१९४७ में देश री आज़ादी रै बाद स्वतंत्र भारत री राष्ट्र भाषा रै सिंहासन माथे हिंदी नै बिराजमान करण री मुहीम चली. देश रा जितरा ज्यादा राज्य खुद नै हिंदी-भाषी घोषित करै उतरी हिंदी मज़बूत बणे. औ विचार ले'र राजर्षि पुरषोत्तम दास टंडन जैपुर पधार्या अर राजस्थान रा उण वगत रा मुखिया राजनेतावां नै अरज करी कै राजस्थान नै हिंदी भाषी राज्य घोषित करो.


उण वगत राजस्थान में हजार लारै एक आदमी हिंदी बोलणीयो नीं देखीजतो


पण हिंदी री मज़बूती खातर राजस्थान रा उण वगत रा राज-प्रमुख अर मुख्यमंत्री भारत सरकार नै लिखित प्रस्ताव सौंप दियो. उण प्रस्ताव रै सागै ई राजस्थानवासियों रै मुंडां ऊपर सवा मण रो तालौ जड्ग्यो. उण दिन राजस्थान गूंगौ होयगो. वों तालो आज तक खुल नीं सक्यो.


लारला ६० बरसां में राजस्थानियों नै मार मार'र हिंदी-भाषी बणावा री कोशिश आज तक जारी है. छतां ७०-८० फीसद राजस्थानी आज भी हिंदी कोनी जाणे. 
घणी फूटरी जुबान वेताँ थकां गूंगो है म्हारो राजस्थान ! 
इण गूंगां री गत  रा चितराम उकेरती राजस्थानी कवितावां रो एक सार्वजनिक मंच बणेला औ ब्लॉग. 
पैली पांत आज  स्वर्गीय कन्हैया लालजी सेठिया  नै घणे मान सूं याद करां, जिणारो लिख्योड़ो  दूहो आपानै मारग घालसी.

खाली धड़ री कद हुवे  चेहरा बिना पिछाण 
मायड-भाषा रै बिना क्यांरो  राजस्थान